Catechisim par furlan (8) – Dal sest articul dal credo

Il sest articul del credo nus insegne che Jesù Crist, cuarante dîs dopo de sô resurezion, presince dai siei dissepui, al lè sù tal cîl par cont so, e che jessint, come Diu, compagn dal Pari te glorie, come om al è stât esaltât parsore ducj i agnui e ducj i sants, e fat Signôr di dutis lis robis.

Jesù Crist dopo de sô resurezion al restà cuarante dîs su la tiere, prime di lâ sù tal cîl, in mût di provâ cun aparizions svariadis che al jere resurît pardabon, e di istruî simpri plui e confermâ i apuestui tes veretâts de fede. Jesù Crist al lè sù tal cîl: 1° par cjapâ possès dal so ream meretât cu la sô muart; 2° par preparâ il nestri puest di glorie e par jessi il nestri Mediatôr e Avocat daprûf dal Pari; 3° par mandâur il Spirtussant ai siei apuestui.

Si dîs di Jesù Crist che al lè sù tal cîl, e de mari sô santissime che e fo assumude, parcè che Jesù Crist, jessint Om-Diu, propit par cont so al lè sù tal cîl, ma la mari che e jere creature, ancje se la plui degne di dutis, e lè sù tal cîl par cont di Diu. Jesù Crist al è sentât a la diestre di Diu Pari onipotent: la peraule sentât e designe il possès pacific che al à Jesù Crist de sô glorie; lis peraulis a la diestre di Diu Pari onipotent a palesin che Jesù Crist al à il puest di onôr parsore dutis lis creaturis.