Sant Zuan de Brébeuf, missionari jesuite

Sant Zuan de Brébeuf, missionari jesuite, nassût a Condé-sur-Vire in France, ai 25 di Març dal 1593; muart tal Canadà, dongje de baie Gjeorgjiane, ai 16 di Març dal 1649. Brébeuf al convertì cussì tancj indigjens che il diaul si imbesteà: par merit di lui uns siet mil personis si convertirin. Intant dal so ministeri tal Canadà, al preà Diu che i des la gracie di patî il martueri.

Il desideri di Brébeuf al jere chel di diventâ fradi laic, ma tal ultin al jentrà te Compagnie di Jesù tant che scolastic, ai 8 di Novembar dal 1617. Ancje se al jere di une fuarce fisiche fûr dal ordenari, la sô salût e cedè dal dut par cause de tubercolosi co al veve vincjevot agns, situazion che e interferì cui siei studis, permetintji di fâ dome ce che i coventave par oblic, di maniere che nol cjapà sù une cognossince teologâl largje; cun dut achel al fo ordenât sacerdot a Fevrâr dal 1622. Al rivà a Québec ai 19 di Jugn dal 1625 cuntun Recolet di non Joseph de la Roche d’Aillon, e a dispiet de menace che il cjapitani calvinist de nâf i fasè di puartâlu indaûr in France, al restà te colonie. Al prevalè su la antipatie dai colons in rivuart ai jesuitis, sielzint un sît de abitazion sul flum Sant Carli, propit dulà che par vieri Jacques Cartier al veve metè sù un campament. Al lè subit a stâ tes tendis dai indigjens, vint detaide cheste sô esperience, di une durade di cinc mês tal colm dal invier, intun rindicont. Rivade la stagjon aviertane, al partì cui indigjens par un viaç in canoe viers dal lât Uron, che la sô vite intant di chel e jere in pericul costant. Cun lui al jere Anne de Nouë, missionari jesuite, e insiemi a meterin sù la lôr prime mission dongje de baie Gjeorgjiane; pôc timp dopo però, il so compagn al fo clamât indaûr, e Brébeuf al restà dibessôl.

Brébeuf nol rivà al so obietîf: clamât dongje par cause dal pericul di estinzion che al tribulave la colonie interie, al rivà a Québec dopo di une assence di doi agns, ai 17 di Lui dal 1628. Samuel de Champlain, ai 19 di Lui dal 1629, si rindè ai inglês, e i missionaris a tornarin in France. La restituzion de colonie a la France si fasè cuatri agns daspò; Brébeuf, ai 23 di Març dal 1633, al partì une altre volte pal Canadà, vint pronunziâts intant dal so timp in France i vôts solens sicu coadiutôr spirituâl. A pene rivât, valadì a Mai dal 1633, al tentà di tornâ al lât Uron. I indigjens si refudarin di cjolilu; vie pal an daspò però, al rivà cun sucès a la sô mission di prime: un viaç di trente dîs e un pericul di muart cence fin. Vie pai sedis agns daspò, agns di fadiis continuis framieç dai indigjens, Brébeuf al vivè une schirie di privazions e soferencis, ma lui stes al disè che dut chest al jere pôc in confront a ce che al jere pront a sufrî par amôr di Diu.

Tal 1640 Brébeuf al partì cun Chaumonot cul fin di evangjelizâ une tribù che e jere a stâ de bande sententrionâl dal lât Erie ma, dopo di un invier di dificoltâts incredibilis, i missionaris a tornarin cence sucès. Al fo mandât a Québec tal 1642, dulà che al veve cure dai indigjens te risierve di Sillery. Co la vuere fra i urons e i irochês e jere al colm, Jogues e Bressani a jerin stâts caturâts tal tentatîf di rivâ te tiere dai urons, e Brébeuf al fo incargât di fâ un tierç tentatîf. Al vè buine riesside: cun lui in chest viaç a jerin Chabanel e Garreau, ducj i doi sassinâts dopo; a rivarin te stazion centrâl de mission uronese.

Tal 1647 i irochês a vevin fate la pâs cui francês, ma a continuarin la lôr vuere cuintri dai urons, e tal 1648 altris disastris a plombarin su la vore dai missionaris: lis lôr instalazions a forin brusadis e i missionaris massacrâts. Il nemì irochês si butà su la vile di Sant Louis ai 16 di Març dal 1649, e Brébeuf e Lalemant a forin cjapâts; a varessin podût scjampâ, ma a refudarin la ufierte che ur veve stade fate e a restarin cul lôr trop. I doi sacerdots a forin menâts vie te vile di Sant Ignazi, za caturade dai irochês; chescj ultins a faserin plombâ parsore dai sacerdots une ploie di claps, ju baterin in mût crudêl cui bastons e po ju learin intor di pâi par brusâju a muart. Si dîs che Brébeuf al vedi bussât il palet che intor di chel lu vevin leât. A piarin il fûc sot di lôr e ju taiarin cui curtìs. Sul cjâf di Brébeuf a strucjarin la aghe bulinte in segn di derision dal batisim, i meterin ator dal cuel un golâr di cjâfs di tomahawk imbuîts, i pararin jù pe gole un fier sbrovent, e co al murì i taiarin fûr il cûr e lu mangjarin. Intant di dut chel suplizi, Brébeuf nol mandà fûr nancje une sole zemude di dolôr. I irochês, finide la lôr vore brutâl, si ritirarin di li. I rescj des vitimis a forin cjapâts sù daspò, e la crepe di Brébeuf e je ancjemò vuardade tant che relicuie tal Hôtel-Dieu, a Québec.

La memorie di Brébeuf e je tignude in grande considerazion tal Canadà. Lis sôs virtûts eroichis, palesadis in mût cussì significant in ogni fase de sô cariere missionarie, il so sopuartâ incomprensibil des privazions e des soferencis, e la convinzion che la cause de sô muart no fos la sô associazion cui urons, ma ben la asse pal cristianisim, a faserin partî un moviment pe sô canonizazion sicu sant e martar. Un tribunâl gleseastic si sentà tal 1904 cul fin di esaminâ la sô vite, lis sôs virtûts e la cause de sô muart, e il risultât de inchieste e fo inviade a Rome: Brébeuf al fo canonizât tal 1930. || Une crôs enorme tal cîl