Il stîl gotic

La art gotiche si svilupà in Europe te ultime fase de Ete di Mieç (XII-XIV secul) intun periodi di trasformazions economichis e sociâls di grant rimarc, periodi che al viodè il superament de societât feudâl e la formazion di centris di podê gnûfs: lis primis monarchiis, lis grandis citâts, il clericât, lis classis gnovis e ricjis dai marcjadants e dai banchîrs. Se il cuadri economic e sociâl de sfloridure di chest stîl al è avonde clâr, al reste pôc comprensibil il parcè dal non gotic doprât dai storics de art: dal sigûr no parcè che i Gôts- un popul origjinari de Scandinavie, cun ogni probabilitât de isule di Gotland- si sedin metûts in lûs pe lôr abilitât di architets: come dutis lis tribûs barbarichis a jerin nomats, che si curavin pôc des cjasis e ancjemò mancul des glesiis, e parsore a jerin pagans; e nancje parcè che i Gôts a fossin a stâ tes zonis che int vioderin la sfloridure, stant che tal I secul prin di Crist a jerin logâts daprûf des fôs de Vistule e che daspò si trasferirin injù par ocupâ la rive çampe dal Danubi. Cun ogni probabilitât i umaniscj talians dal Rinassiment a adotarin il tiermin gotic tant che sinonim di barbaric, tal sens di divignint des regjons di là des Alps, in contraposizion a romanic.

Al reste dut câs il fat che cheste art e à non gotiche ancje se e nassè tal cûr de France- deventade ream sot de dinastie dai Capezians- e di un precîs te regjon Île-de-France, fertile e prospare, insù di Parîs, là che si cjate ancje un gjenar otim di cret calcari, resistent e di lavorazion facile. Dal 1140 al 1144 il côr de abazie di Saint-Denis daprûf di Parîs lu faserin sù di gnûf: cuicusei che al fos stât il progjetist de ricostruzion, si pues segnalâlu sicu inventôr dal stîl gotic. Di chest moment indenant lis citâts francesis a davin la impression di fâ une gare tal fâ sù, o ben tal tornâ a fâ sù, in formis gotichis lis lôr glesiis: la façade de catedrâl di Chartres, Notre-Dame di Parîs, la catedrâl di Reims, Notre-Dame di Amiens, la catedrâl di Beauvais, dutis chestis oparis a segnin il colm dal gotic francês.

Partint de regjon Île-de-France il gotic si difondè in dute la Europe. Il prin edifici gotic inglês, la catedrâl di Canterbury, al fo scomençât tal 1174 da un architet francês, Vielm di Sens; a capitarin daspò altris oparis mestris: la catedrâl di Lincoln, iniziade tal 1192, la catedrâl di Wells, la abazie di Westminster (1245), la catedrâl de Sante Trinitât di Gloucester. Il gotic todesc nol cjape dentri dome la Gjermanie stesse, ma dut il teritori linguistic des popolazions gjermanichis, slargjant il so inflùs te Europe orientâl e te Scandinavie: lis sôs oparis mestris a son il domo di Colonie, che la sô prime piere e fo metude jù tal 1248, la catedrâl di Friburc, la catedrâl di Sant Stefan a Viene. In Spagne e in Italie il gotic al è mancul autentic, valadì latinizât, pierdint i siei caratars plui tipics. Lis manifestazions estremis dal gotic a vignirin fûr sul finî dal XV secul cul gotic cussì clamât fulminant, cence però la vitalitât creative di une volte.

Traduzion: Come riconoscere l’arte europea, Rizzoli Editore, Milan (1986), pagjinis 67-68.