Il diaul al è pecjadôr fin dal principi

Tal Vieri Testament il pecjât al è esponût come at di disubidience (Gjenesi 2,16-17; Gjenesi 3,11; Isaie 1,2-4; Jeremie 2,32); come ofese a Diu (Numars 27,14); come alc di odeât e cjastiât di Diu (Gjenesi 3,14-19; Gjenesi 4,9-16); come danôs pal pecjadôr (Tubie 12,10); di espiâ cu la pinitince: «Il gno sacrifici, Diu, al è un cûr pentît, un spirt che si pentìs e si plee; tu, Diu, no tu lu spreseis» (Salms 51,19).

Tal Gnûf Testament sant Pauli al insegne in mût clâr che il pecjât al è une trasgression de leç (Romans 2,23; Romans 5,12-20); une servitût che o sin liberâts di chê par gracie di Diu (Romans 6,16-18); une disubidience (Ebreus 2,2) punide di Diu (Ebreus 10,26-31). Sant Zuan al descrîf il pecjât tant che une ofese a Diu, un disordin de volontât (Zuan 12,43), une inicuitât: «Chel che al fâs il pecjât, al fâs ancje l’inicuitât, parcè che il pecjât al è l’inicuitât. O savês che lui si è pandût par cjapâ sù i pecjâts e che in lui no ’nd è pecjât. Chel che al reste in lui nol pecje; chel che al pecje, no lu à ni viodût ni cognossût. Fîs, che nissun no us imbroi. Chel che al met in pratiche la justizie al è just, come che lui al è just. Chel che al fâs il pecjât al ven fûr dal diaul, parcè che il diaul al è pecjadôr fin dal principi. E il Fi di Diu si è pandût propit par disfâ lis voris dal diaul. Chel che al è nassût di Diu nol fâs pecjâts, parcè che al à dentri di sè une semence divine, e nol pò pecjâ parcè che al è nassût di Diu. Di chest si diferenziin i fîs di Diu dai fîs dal diaul: chel che nol met in pratiche la justizie nol è di Diu, e nancje chel che no i vûl ben a so fradi» (1 Zuan 3,4-10).

Crist, in tantis des sôs enunziâts, al insegne la nature e la puartade dal pecjât. Al vignì par promulgâ une leç gnove, plui perfete di chê viere, leç che e cjape dentri l’ordenament no dome dai ats esternis, ma ancje di chei internis intun grât no cognossût prime di chel moment, e tal so discors su la mont, al condane tant che pecjaminôs une vore dai ats che a forin judicâts onescj e juscj dai dotôrs e dai mestris de leç viere. Al denunzie in mût speciâl la ipocrisie e il scandul, la infedeltât e il pecjât cuintri dal Spirtussant. In particolâr al insegne che i pecjâts a vegnin dal cûr: «Di fat dal cûr a vegnin pinsîrs triscj, sassinaments, adulteris, fornicazions, robariis, testemoneancis falsis, blestemis. Chestis a son robis che a sporcjin l’om. Mangjâ cence lavâsi lis mans nol sporcje l’om» (Matieu 15,19-20).