Il Spirt nus da une man

Come ogni at che al puarte a la salvece, e covente la gracie no dome par disponinus a la orazion, ma ancje par judânus a determinâ par ce robe che o vin di preâ. In chest «il Spirt nus da une man e nus jude te nestre debolece; di fat no savìn nancje nô ce che al va ben domandât, ma al è propit il Spirt che al pree par nô cun zemits che no si rive a contâju» (Romans 8,26).

Par cierts fins o sin simpri sigûrs de bisugne di preâ, come la nestre salvece e i mieçs par otignîle, la resistence a la tentazion, la pratiche de virtût, la perseverance finâl; ma di un continui o vin bisugne de lûs e de vuide dal Spirt par cognossi i mieçs speciâi che nus judaran di plui cun ogni bisugne particolâr. A fin che nualtris no sbaliedin in cont di un oblic cussì essenziâl, Crist nus à insegnât ce che al va ben domandât te orazion e ancje in ce ordin che o vin di domandâlu. Di rispueste a la domande dai siei dissepui di insegnâur a preâ, Crist al à dit sù il Pari nestri; di cheste orazion al salte fûr che, prin di dut, o vin di preâ par che Diu al sedi glorificât e che a chest fin i oms a sedin citadins degns dal ream dai cîi, vivint seont la volontât di Diu.

Cheste conformitât e je, cun di fat, implicite in ogni orazion: no vin di domandâ nuie che no si conformedi in maniere rigorose a la providence divine tai nestris confronts. In plui dai fins spirituâi de nestre orazion, o vin di domandâ ancje lis robis temporâls, il nestri pan di ogni dì, e dut ce che chest al cjape dentri: salût, fuarce e altris bens temporâi, no dome materiâi o corporâi, ma mentâi e morâi, dut ce che al sarès un mieç par servî Diu e il nestri prossim. Tal ultin o varessin di preâ di podê evitâ i mâi, il cjastic dai nestris pecjâts, i pericui de tentazion e ogni gjenar di aviliment fisic o spirituâl, te misure che chescj a podaressin impedînus di servî Diu.