Une crôs enorme tal cîl

Sant Zuan de Brébeuf al convertì cussì tancj indigjens tal Canadà che il diaul si imbesteà: par merit di lui uns siet mil personis si convertirin. Plui indenant il sant al subissarà ancje atacs diaulics. Al scrîf: «Ai 21 di Avost (dal 1637) […] o vei une vision, reâl o imagjinarie, là che o viodei une fulugne vaste di demonis vignî viers di me cul fin di divorâmi o, almancul, di muardimi. Ma nissun di lôr nol fo bon di fâmi cuintri. Chei che a rivavin par prins a someavin cjavai enormis, ma lis lôr crinieris a jerin lungjis e ondadis, come chês dai rocs e dai becs. No mi visi de forme di chei altris, ma o sai che a jerin cetancj di lôr e che a vevin formis diviersis, ancje plui spaventôs che mai. Cheste vision e durà il timp di un Miserere. No mi visi di vê vude pôre ma, fidantmi di Diu, o disei: Fait dut ce che Diu us permet di fâ; no mi sbregarês vie un cjaveli dal cjâf cence il so consens e il so comant» (Relazions dai jesuitis dal 1637).

«Ai 9 di Mai, intant che o jeri te vile di Sant Josef, a colp mi cjatai cjapât di ats di amôr potents di Diu e mi sintii sburtât viers Diu a imbraciâlu. Daspò al comparì alc che al someave une siore viele. Prin cheste mi imbraçà, po e batè il gno cjâf cuintri di jê cussì a fuart che mi fasè mâl une vore. Scrupulant che cheste siore viele e fos propit il diaul, mi fasei il segn de crôs par protezimi il cerneli. Podopo la siore si tirà indaûr e no olsà plui di svicinâsi a me».

Brébeuf al veve simpri volût patî il martueri e, intant dal so ministeri tal Canadà, al preà Diu cul fin che i concedès cheste gracie. Lui stes al scrîf: «A son doi dîs che o sint dentri di me un grant desideri di martueri e di patî ducj i torments che a patirin i martars». Daspò di tancj agns di orazion, la sô preiere e fo esaudide. Al vè une vision che e prediseve il so martueri: tal 1640 al viodè tal cîl meridionâl une crôs di proporzions enormis, avonde grande di podê contignî no dome une persone, ma ognidun dai jesuitis che a lavoravin in chê mission, vint par prionte chest di rimarc, che e comparì sul teritori dai irochês. || Il martueri di sant Zuan de Brébeuf