De imitazion di Crist, libri I, cjapitul I. Dal dispreç des vanitâts dal mont.

De imitazion di Crist, libri I, cjapitul I.
Dal dispreç des vanitâts dal mont.

1. Chel che al ven daûr di me nol cjamine tal scûr ma al varà la lûs de vite, dissal il Signôr. Peraulis di Crist, lui che midiant di chestis nus vise de impuartance di imitâ la sô vite e i siei costums, se o volìn pardabon iluminâsi e liberâsi di ogni vuarbetât dal cûr. Il nestri sfuarç plui grant che al sedi duncje chel di meditâ su la vite di Jesù.

2. La dutrine di Crist al supere chê di ducj i sants, e chel che al à il spirt di lui al cjate là dentri la mane platade. Ma al sucêt che tancj di lôr, vint tantis voltis scoltât il vanzeli, si comovin pôc, parcè che il spirt di Crist no lu àn. Chel duncje che al vûl une comprension plene e sauride des peraulis di Crist al scuen sfuarçâsi par fâ che dute la sô vite si conformedi a chê di lui.

3. Ce ti zovial di podê discuti a fonts de Trinitât se tu âs une carence di umiltât, e par chel tu i displasis a la Trinitât? Lis peraulis altis no ti fasaran sant e just, ma la vite virtuose e fâs che Diu ti vedi a cjâr; miôr cjatâsi in stât di contrizion che no in stât di podê definîle. Se tu cognossis dute la Biblie e dutis lis detulis dai filosofs, ce ti zovaràial cence la caritât e la gracie? Nuie di nuie, dut al è nuie infûr di chest, che tu amis Diu e dome lui tu servissis. Chest al è il massim de savietât: pal dispreç dal mont instradâsi pal ream dai cîi.

4. Ce vanitât duncje chê di cirî lis ricjecis che a pasaran, e di fidâsi di chês stessis. Ce vanitât alore chê di ambî i onôrs, e di tignîsi superiôr. Ce vanitât chê di lâ daûr dai desideris de cjar, e di bramâ chês robis che in curt ti costaran un cjastic sevêr. Ce vanitât chê di volê la vite lungje, e di viodi pôc di chê buine. Ce vanitât chê di vê tal cjâf dome la vite presinte, e di no tignî cont di chê cu vignarà. Ce vanitât chê di preseâ ce che al passe cun ogni sveltece, e di no fâ di corse par rivâ dulà che e je a stâ la gjonde eterne.

5. Impensiti dispès di chest proverbi: Il voli no si pas di ce che al viôt, ni l’orele no si jemple di ce che e sint. Sfuarciti duncje di discjoli il to cûr dal amôr pes robis visibilis, par voltâti de bande di chês invisibilis. Di fat chei che a van daûr des lôr voiis si sporcjin la cussience, e a pierdin la gracie di Diu.