De imitazion di Crist, libri I, cjapitul II. De bisugne di vê une opinion basse di sè.

De imitazion di Crist, libri I, cjapitul II.
De bisugne di vê une opinion basse di sè.

1. Al è naturâl che ogni om al vedi il desideri dal savê: ma il savê cence il timôr di Diu, ce impuartance àial? In veretât il contadin umil che al servìs Diu al è miôr dal filosof supierbeôs, lui che, vint dismenteade la cure di sè stes, al scrutine il cors dal cîl. Chel che si cognòs ad in plen si crôt indegn, e des laudis dai oms nol à gust. Se o savès dutis lis robis dal mont cence vê la caritât, ce mi zovaràial denant di Diu, lui che mi judicarà daûr des oparis?

2. Viôt di morestâ il desideri ecessîf dal savê, là che si cjatin dome distrazions e ingjans. Chei di sience a son seneôs di fâsi viodi dai oms, che i oms ur disedin savints. Tantis robis cognossibilis a son pe anime di pôc o di nissun zovament, e lui al è une vore imprudent che al sta daûr di chestis, impen di chês che a servissin pe sô salvece. La bondance di peraulis no sacee la anime, ma la buine vite e rinfrescje la ment, e la cussience pure e da grande fiducie in Diu.

3. Plui e miôr tu sâs e plui ti judicaran cun rigorositât, infûr di vê vivût cun plui santitât. No sta tignîti duncje superiôr par merit di cualchi art o sience, ma tem pluitost chel savê che tu âs. Se ti pâr che tu savedis tantis robis, che tu capedis une vore ben, ten a ments che a son un grum plui numerosis chês robis che no tu sâs. No sta cirî di vê une grande sience, ma palese pluitost la tô ignorance. Parcè vuelistu metiti denant di chei altris, jessint che tancj di lôr a son plui studiâts e plui competents di te inte leç? Se tu vuelis vê sience e imparâ cun profit, che ti plasedi lâ discognossût e no tignût di rivuart.

4. Cheste e je la lezion plui alte e utile, di cognossisi dabon e di spreseâsi. Al è di grande sapience e di perfezion no tignîsi in nissun cont, vint simpri chei altris in grande considerazion. Cualchidun co tu lu viodis a fâ cualchi pecjât a viert, ancje di chei plui grivis, no tu âs par chel cont di stimâti miôr di lui, stant che no tu sâs fint a cuant che tu podarâs condurâ tal ben. O sin ducj debii, ma tenti plui debil di ducj chei altris.