De imitazion di Crist, libri I, cjapitul III. De dutrine de veretât.

De imitazion di Crist, libri I, cjapitul III.
De dutrine de veretât.

1. Furtunât chel che al ven istruît de veretât stesse, no par mieç di imagjins e di peraulis che a passin, ma cussì come che e je par vêr. La nestre opinion e il nestri sintiment nus ingjanin dispès e o viodìn pôc. Ce nus zovial di argomentâ cun pedantarie su di robis platadis e scuris, che par ignorance di chestis no sarìn nancje incolpâts te dì dal judizi? Ce grande stupiditât chê di trascurâ lis robis utilis e necessariis, di stâ invezit daûr di chês che a son curiosis e danosis. O vin vôi e no viodìn.

2. E parcè lino cul pinsîr ai gjenars e a lis speciis? Chel che a lui la Peraule eterne i fevele si libere di tantis opinions. Midiant di Crist, che al è la Peraule, a son dutis lis robis, e dutis lis robis a fevelin di lui, jessint lui chel stes che al è il principi che nus fevele ancje a nualtris. Nissun nol capìs cence di lui, nol judiche cun dreture. Chel che par so cont dutis lis robis a son une sole, che di dutis lis robis al fâs vignî fûr une sole, che in dutis lis robis al viôt une sole, al pues lâ cun saldece e restâ in Diu cun cuiete. O Veretât Diu, fai di me dutun cun te une robe in caritât perpetue. Dispès mi stufi a lei, a scoltâ tantis robis: in te al è dut ce che o volarès e che o pues desiderâ. Ducj i dotôrs che si cidinedin, dutis lis creaturis che a mutuledin denant di te; a me fevelimi dome tu.

3. Plui un om al sarà unît e racuelt in sè stes e plui ample e cence fadie e sarà la sô comprension des robis, cussì in numar come ancje in altece, jessint che al è di adalt che al ricêf la lum di inteligjence. Il spirt pûr, sempliç e stabil nol è distrat intes sôs tantis oparis, parcè che al fâs dut in onôr di Diu, e di ogni sodisfazion personâl si messede di restâ libar. Ce ti impedissial e ti disturbial plui di chê afezion no mortificade dal to cûr? L’om devot e daben prime al dispon par didentri lis sôs oparis, chestis che par difûr a coventin fatis; e chestis no lu train viers dai desideris des voiis viziosis, anzit lui le volte sot de norme de reson drete. Cui vuerezial plui dal om che si cjape l’impegn di vincisi? La nestre ocupazion e varès di jessi cheste: vincisi clâr, e ogni dì savêsi dominâ di plui, e lâ indenant simpri miôr.

4. Ogni perfezion e je acompagnade in cheste vite di cualchi imperfezion, e ogni nestre speculazion no je cence un pocje di calighere. La cognossince umile di te ti fâs di strade viers Diu plui sigure che no la inchieste profonde de sience. Cun dut achel no si à di incolpâ la sience ni nissune altre cognossince di robis che a son buinis, afidabilis e ordenadis di Diu; miôr però vê la cussience nete e menâ une vite virtuose. Tancj di lôr a cirin plui di meti adun cognossincis invezit di vivi ben, e par chel a falin dispès e a restin cun pôc o nissun vantaç.

5. Oh, se i oms a doprassin tante diligjence tal dislidrisament dai vizis, e tal inlidrisament des virtûts, come che a doprin tal moviment des cuistions, no esistaressin framieç dal popul tancj mâi ni scandui cussì grancj ni tante dissipazion tai munistîrs. Te dì dal judizi, in veretât, no nus sarà fate la domande par savê ce che o varìn let, ma ce che o varìn fat; no trop che o varìn fevelât ben, ma trop che o varìn vissût daûr religjon. Disimal, dulà sono ducj chei dotôrs e mestris, chei che tu cognossevis co a vivevin ancjemò ben e pal studi a sflorivin? A possedi lis lôr renditis a son aromai altris oms, e no sai se chescj oms si ricuardin di lôr. In vite a someavin impuartants, e za aromai di lôr no si fevele plui.

6. Oh, cun ce prontece che la glorie dal mont e passe. Fossie concuardance fra la lôr vite e il lôr savê, si che duncje a varessin let e studiât cun profit. Trops che a son i oms di chest mont cu perissin colpe sience vueide, cu àn pocje cure dal servizi di Diu. E stant che il jessi grancj lu metin denant dal jessi umii, si lassin strissinâ daûr pinsîr. Propit grant al è chel che dentri di sè al è piçul e che al ten par une robe di nuie ogni altece di onôr; propit savi chel che i vantaçs di cheste tiere ju considere scovacis par vuadagnâ Crist; e propit dot chel che al fâs la volontât di Diu e che al bandone la sô.