De imitazion di Crist, libri I, cjapitul VI. Des afezions disordenadis.

De imitazion di Crist, libri I, cjapitul VI.
Des afezions disordenadis.

1. L’om, ogni volte che al brame in maniere disordenade une robe, al devente subit incuiet in se stes. Il supierbeôs e l’avâr no cjatin mai padin, ma il puar e l’umil tal spirt a vivin te bondance di pâs. A la preste si lasse tentâ e vinci in robis che a son piçulis e bassis chel om che, dentri di sè, nol è ancjemò muart ad in plen. Chel che tal spirt al è infer, e ancjemò carnâl in cualsisei mût, e puartât a lis robis sensibilis, dai desideris terens al rive cun dificoltât a discjolisi dal dut. Tirantsint vie duncje al prove dispès avilizion, e svelt si sint dispreçât se cualchidun i ten dûr.

2. Se però al cîr di vê ce che al brame, de reitât de cussience daurman al è cjariât, jessint che daûr de sô passion al è lat, azion che no lu jude a vê chê pâs che al cirive. La vere pâs dal cûr si le cjate alore fasint resistence, e no servizi, a lis nestris passions. No ind è duncje pâs tal cûr dal om carnâl, in chel om che al è puartât a lis robis esternis, ma invezit tal om spirituâl e ferbint.