De imitazion di Crist (libri I, cjapitul XIII), dal resisti a lis tentazions.

1. Nualtris, fintremai che o vivìn in chest mont, no podìn passâ cence tribulazions, cence tentazions. Par chel in Jop al è scrivût: «L’om no frontial forsit une lote dure su la tiere?». Ogni om al varès duncje di restâ atent a rivuart des sôs tentazions, e in preiere di veglâ, par no che la ocasion di ingjanâlu le cjatedi il diaul, lui che nol duar mai, ma che al baline torator smicjant di glotinus. Nissun om nol è cussì sant, cussì perfet, di no vê tentazions ogni tant, e di chestis ultimis no podìn sei libars ad implen.

2. Epûr lis tentazions dispès a son profitevulis une vore pal om, ancje se molestis e griviis, jessint che l’om, midiant di lôr, al ven umiliât, purgât e istruît. Ducj i sants a scugnirin passâ par tantis tribulazions e tentazions, e chestis ur puartarin vantaç; chei invezit che no rivarin a sopuartâlis a colarin inte perversion e a faserin apostasie. No ind è ordin cussì sant, ni lûc cussì segret, di no cjapâ dentri cualchi tentazion, cualchi traversie.

3. Nissun om, fintant che al vîf, nol è libar in mût assolût des tentazions, daspò di chest, che si cjate dentri di nualtris dut il parcè de nestre tentazion, nassûts che o sin te concupissence. Si slontane une tentazion, une tribulazion, e daurman nus int rive dongje une altre; e simpri o vin ce patî, vint pierdût il ben de nestre felicitât. Denant des tentazions tancj di lôr a cirin di scjampâ, e là dentri a colin in mût plui danôs inmò. Cirint dome di scjampâ no podìn vê la vitorie, ma vint pazience e vere umiltât o deventìn plui fuarts di ducj i nemîs.

4. Cui che dome par difûr si int vuarde, che no lis tire fûr des lidrîs, pôc vantaç al traiarà; anzit plui prest ancjemò lis tentazions i tornaran dongje, e piês di simpri. Vie vie, e sopuartant cun pazience, tu lis vinçarâs miôr cul jutori di Diu che no par merit to, cun violence e turbament. Te tentazion viôt spes di cjapâ consei, e cuntun che al è tentât no sta fâ cun durece, ma dài chê stesse consolazion che tu âs gust che i oms ti dan a te.

5. Il principi di dutis lis brutis tentazions al è la incostance di cûr e la pocje fiducie in Diu. Come une nâf cence tamon che e je sbalotade par ca e par là des ondis, cussì ancje l’om cence cure, e che il so proponiment al bandone, in mût vari al è tentât. Il fûc al provine il fier, e la tentazion l’om just. Dispès no savìn ce che o podìn, ma la tentazion nus palese ce che o sin. O vin duncje di stâ atents massime sul imprin de tentazion, jessint che al è in chel moment che o batìn il nemì cun plui facilitât, se a nissun pat no i sedi permetût di jentrâ pe puarte dal cûr, ma su la jentrade stesse, prime ancjemò che al vedi tucât, lu parìn indaûr. Al fo dit inalore: «Metiti in oposizion a prin tîr, che il rimiedi al rive simpri tart», parcè che prime nus ven a ments dome la idee, po la fantasie ferbinte, daspò la delizie e il brut mot dal anim, e po daspò l’assintiment. E cussì, il nemì malin planc planchin al fâs ad implen la sô jentrade, se nualtris fin dal principi no i tignìn bot. Plui o sin sflacjons tal fâi resistence e plui ogni dì o deventìn plui debii par dentri, e il nemì cuintri di nualtris plui potent.

6. Cualchidun al sufrìs tentazions plui griviis tal imprin de sô conversion, cualchidun tal ultin; e cualchidun ind è tormentât dilunc vie di dute la sô vite, o cuasi. Cualchidun altri po ind è pôc tentât, seont la sapience e la justizie dal ordin divin, che al pese il stât e i merits dal om, preordenant dutis lis robis in cont de salût dai siei elets.

7. Sicheduncje no stin a disperâsi cuant che o sin tentâts, ma viodìn di preâ Diu cun plui ferbince, a fin che lui si degnedi di judânus in ogni nestre tribulazion, parcè che lui, seont lis peraulis di sant Pauli, di un sigûr nus darà cu la tentazion ancje il mût di sopuartâle. Sbassìn duncje lis nestris animis sot de man di Diu in ogni tentazion e tribulazion, par cheste reson, che lui al salvarà i umii tal spirt e ju esaltarà.

8. Tes tentazions e tribulazions l’om al è provinât, cetant che al à profitât; e lui par chel int gjave merit plui grant, e miôr si vistìs la sô virtût. E nancje nol è di rimarc che l’om al sedi devot e ferbint co traversiis no lis à, ma se lui in timp di dificoltât si rêç cun pazience, alore e nassarà par lui une sperance di profit notabil. Cualchidun si pare des tentazions griviis, ma in chês plui piçulis di ogni dì al è dispès vinçût; e chest, par che umiliât no si fidedi mai des sôs fuarcis tes grandis tentazions, jessint propit debil ancje denant di une robe di nuie.